HIKAYAT GANGGA PARI (part 7)

Putroe Rakna Hayati

Subahanallah ajeb meulumpah

Akan keukisah keunyoe karangan.

Adak pih timoh, leo that masalah

Lon ilah ilah sampoe seuleusai.

Beugeubri le Poe teuh sidroe Allah

Beukeuh ek leupah lon nibak jalan.

Beu ek lon peugot ngon siap rawi

Beusampoe jadi wahe e taulan.

Keunyoe karangan masa yoh lawi

Yoh manteong sakti di dalam badan.

Yoh manteong di lee geumeutueng pari

Jeut ula ili jidalam awan.

Manteong na indra kadeungon diwa

Dan lom seureuta ngon jeuneh mambang.

Cukop meusyuhu di dalam dunya

Kheundak rabbana kanibak insan.

Gampong alue breuh ngon ujong rampu

Di coet geulungku na syahit lapan.

Bareh lon balek titek lon jampu

Meunyang tan nafsu neutulong diam.

Keurana susah ulon rok kata

Taeu b ngon a habeh meurupang.

Taeu m ngon i cit ka meutuka

Neuk maklum saja bek chok ngon waham.

Seubab lon abu bukon that hibat

Bak buet seumurat ilmee leo kurang

Leubeh lom teungku polem piadah

Watee meukisah keubit that timang.

Keuhai hikayat get that meupuep dah

Habeh geusurah paneuk ngon panyang.

Dan lom ka taeu keu dara bambi

Cit meuboh campli asoe di dalam.

Miseu tapajoh cit rasa keu eung.

Deungon boh kiyuen meuleupah masam.

Adak lagee nyan ulon cap laju

Polem bit hayeu nibak keumarang.

Tapi nyang paloe sipeu nyang kureung

Dari yoh jimeun cit manteong lajang.

Polem piadah leh tan geugalak

Keu sidroe cut kak seunupet badan.

Aleh tan tingat keu asoe kulak

Taeu meubhak bhak ji dalam rantang.

Aleh pih nafsu tanle meubacut

Abeh jilinteup nibak taeu sang.

Nyang na teuingat cit keucupo nang

Laen cut intan cit han geupandang.

Leh jipat leubeh meunyan bit cupo

Taeu that kuto gigoe meurumpang.

Alah kapaloe nyoe bit hai yah wa

Beh peunyoe reoh ka ulon keumarang.

Ulon neuk peugah keu ureung dua

Ka polem kuta roh lam sampiran.

Beh ka keuh jinoe keudeh tapuwoe

Akan keu cupoe meunyan dendayang.

Leugat ka dijak sapat han dideong

Meulenggak lenggong langkah meujalan.

Di po dendayang jijak le lanja

Akan seureuta seuon ngon hidang.

Juhoe ngon rakna neutreon le leugat

Kanibak deelat raja syah alam.

Oh troh dendayang ka ji peureugi

Ka jipeugah kri dum seukalian.

Kahabeh deumpeu dum jipeugah kri

Ban nyang kheun cut ti cit hana kurang.

Teukhem neuh bacut po bintang pari

Cit kaneukri lenggong ngon kalam.

Cut po dendayang katroh le lanja

Ubak nek tuha rumoh nyang manyang.

Di po dendayang kateuhah babah

Ji eu that ceudah bak sang buleun trang.

Teudong teutahoe hana peu peugah

Meubuju darah ban saboh badan.

Ta mise uroe cit teungoh beukah

Hu meujeureulah di dalam alam.

Cit kateudong le mise geupula

Hana le haba katahe mandang.

Hana tom ji eu dilee nyang ka ka

Tamise tupa ban pirak upam.

Ta mise keu meuh banlheuh geuteumpa

Deungon ie muka sit nadum intan.

Di po dendayang teuma neusujud

Bak teuot pocut nyang that andalan.

Cut gangga pari teuma teugeujot

Dipo bintang srot meunoe le kalam.

Pakon jeut hai da ulon taseumbah

Sit jeut keu teulah wahe dendayang.

Lon bukon bangsa ureung nyang meugah

Beh peu taseumbah e da dendayang.

Sabet keuh beuna cit ban takheun nyoe

Kanibak kamoe nyoe adat reusam.

Akan teutapi nacit meubacut

Meunyang meukeusut wahe buleun trang.

Meunghan lon turi padan ngon patot

Rugoe geuseubot ulon dendayang.

Cit sia sia lon neupeularha

Ka uleh raja meunyang po makam.

Hana meuri meuh deungon teumbaga

Nyan cit peucuma nama dendayang.

Cut gangga pari teuma neuseuot

Di ateuh patot hai kak dendayang.

Meuhoe keumeung jak hai kak bintang srot

Beh peu meukeusot keunoe ta datang.

Teuma dendayang seuot le pantah

Bit ceudah leupah si aneuk jalang.

Keujeut troh patek keunoe meulangkah

Cut putroe indah yue mee surohan.

Nyompat hai tungku hidang dua boh

Nibak pocut jroh nyoe peurseumbahan.

Jeh tanda euncien ka neuteurimong

Le pocut bungong nyan putroe intan.

Teuma na bacut kaneuyue tanyong

Seubab that bingong cut putroe intan.

Saleum bak putroe meunyang jroh rupa

Han ek lon buka nyang sikelian.

Akan masalah cut putroe muda

Ubak meukuta po syahi alam.

Gaseh ngon sayang bak pirak lipat

Neupeugah siat wahe buleun trang.

Seubab cut putroe get that meularat

Timu ngon barat jiteuka urang.

Bit hana daya keuneuk peulheuh droe

Di tuan putroe nyang that andalan.

Meunyan keuh seubab neumita ilah

Keumasalah beuneutem peutrang.

Meusoe nyang peuglah keu masaalah

Cit neubri upah peu peu sukaan.

Meunan neuharap cut putroe indah

Wahe meuh mirah nyang that andalan.

Teuma jaweub le cut pari gangga

Tadeungoe haba hai kak dendayang.

Bek laan nyan hai keu putroe muda

Ateuh jeumala bak ulon tuan.

Cit ka ulon niet intan peurmata

Sang sang peunawa keu ubat badan.

Sijuek ngon hate ulon lam dada

Ulon niet donya sang ka neuupulang.

Sang sang nibak lon hidang syuruga

Padum nan rasa he kak dendayang.

Akan teutapi na bacut susah

Keu masaalah ka neutanyong ban.

Beh pane daya deungon lon ilah

Han ek lon peuglah akai ulon tan.

Bek laan ulon nyoe saboh bala

Dum raja raja cit gadeoh ajam.

Dum aneuk raja deungon peundeta

Cit hana daya dum seukalian.

Keubit pih meunan hai da meutuwah

Ulon ci peuglah keu wayang wayang.

Salah ngon beuna nyang bek muruka

Seubab di hamba cit ureung dagang.

Hana eeleumee di dalam dada

Alah ka suka ulon pakriban.

Meungbit bek ramee hai da meutuwah

Beuna ngon salah ulon meukalam.

Meunan keuh haba cut bungong mirah

Neubeudoh pantah le po dendayang.

Beudoh neuseumbah cut pari gangga

Kajijak gisa laju u dalam.

Troh nibak putroe neupeugah haba

Cut pari gangga ka ulon pandang.

Ampon e pocut nyang that meutahta

Ulon eu rupa bit jroh hana ban.

Ta mise uroe di teungoh beukah

Cahaya limpah get that jeureulang.

Kanibak laku ulon eu rupa

Sang aneuk diwa meunan nyum sang sang.

Akan teutapi beuna ngon salah

Meubek amarah e syahi alam.

Meunan dendayang neupeugah haba

Kaubak raja cut pirak upam.

Ulon peuriwang nyoe ubak beunoe

Keu masa putroe neuyue mee hidang.

Teungoh neumarit cut pari gangga

Di ponek tuha keunan le datang.

Teuma ka neukheun le meunoe haba

Pajan ka teuka dikah dendayang ?

Teuma neuseuot cit baro saja

Wahe nek tuha ulon ba hidang.

Peubuet keuh keunoe nibak cuco kee

Nyan geukoh ulee keuh mate geucang.

Wahe e cucoe cut bungong kumbee

Nyoe jimeung tipee gata e intan.

Meunyang jroh aneuk bah keuh tabungka

Tajak udehta hai pirak upam.

Miseu kateuhah nyan babah buya

Cit jikab gata wahe buleun trang.

Maken sidroe teuk cut mulu teuma

Meunyan pih buya lam krueng seunagan.

Oh tee jikalon nyoe cuco hamba

Sit puteh mata dipo dendayang.

Meunan keuh tuto di ponek siti

Dibintang pari singab le yoh nyan.

Hana meusapeu jeunaweub neubri

Bak neukalon ri ponek muwayang.

Di po dendayang teuma neuseuot

Ponek jicarot le meunoe macam.

Bit datok suwang sirimueng angkot

Bak buet han patot oh tameukalam.

Bah keuh kupeugah ka ubak putroe

Kah kuyue pasoe u dalam teupang.

Bit datok paleh hana neuthee droe

Dum nyan sa gigoe ka habeh rumpang.

Nibak cek sari akan kupeugah

Bah nak geupoh kah nyawong keuh simpan.

Sigoe cit banlhee kuyue peusudah

Bit haram jadah kah datok suwang.

Oh ban nek deungoe ka meunan haba

Neupeugot geumpa le deungon badan.

Kayeo ngon atot jeub jeub anggota

Geucom le neuwa cut da dendayang.

Wahe e aneuk po bungong mirah

Ponek kaleupah nyoe bacut kalam.

Lon kateulanjoe nyoe bacut lidah

Beubek tapeugah nibak cut intan.

Bukon kusaja wahe meuh meuntah

Cit paleh babah lon he dendayang.

Cit kubri aneuk nyang ie bu peudah

Nak mangat leupah wahe buleun trang.

Nyang keuh ngon haba nyoe bek tapeugah

Wahe nyak pelah beh cut nyak sanan.

Meubek na tangieng lon siblah mata

Ulon ka tuha beuna ka sayang.

Di po dendayang seuot le pantah

Beh peutapeugah hai datok suwang.

Beunoe that galak oh neusuet lidah

Jinoe kateulah bit datok rumpang.

Cut gangga pari sibungong kumbee

Ka geungieng lagee ponek ngon dayang.

Ka teukhem bacut cut pari gangga

Nyan ureung tuha ka jipeuwayang.

Neu eu le ponek neupeuget beu ee

Bit get that digee kaneuba wayang.

Teutap keuh oh noe dilee nyoe haba

Beudoh neugisa cut po dendayang.

Oh ban sare troh u dalam kuta

Neupeugah haba ubak cut intan.

Ban ban nyang marit di bungong mulu

Cit meung sigeutue bit hana kurang.

Putroe neudeungoe hate neuh seu ue

Bingong geuneuk eu cut po andalan.

Nibak masa nyan di tuan putroe

Neuhoi pe meuntro ju rijang rijang.

Cit na sikeujab katroh le sampoe

Neubeuot jaroe get that meulayang.

Ditron le sabda ka ubak putroe

Wahe e meuntroe meunyang pilehan.

Neu eu peundeta meuna lapan droe

Toh toh yang raghoe akai geuh tajam.

Meunyang leo akai cit leubeh tuha

Beunyan tamita di dalam kawan.

Neupeugleh bulee ban sianeka

Cit satu apa he jangan kurang.

Na sidroe ureung keunoe neuk langkah

akan masalah jineuk peugah ban.

Nabsu jih pihtan raya sileumpah

Meunan nyang that sah oh di meukalam.

Oh tee lon ingat wahe e mama

Bit sangat beuna keu peukataan.

Miseu leo ureung cit keupeu guna

Oh akhe teuma kajeut keu wayang.

Bandum tieb tieb syoe meunyang teubuni

Nyang na geurasi cit ma'anikam.

Miseu ka lahe meunyang teujadi

Cit meuhat jadi bak akhe kalam.

Meunan keuh haba cut tuan putroe

Hingga ngon uroe pih sang kamalam.

Sehingga teuma le singoh uroe

Dituan putroe deungon dendayang.

Katroh u balee le teuma dudoe

Bandum sinaroe ji ikot sajan.

Katroh bak watee deungon kutika

Cut putroe muda nibak masa nyan.

Deungon dendayang dan balatantra

Di aneuk raja meunyang pilehan.

Cit bandum manteong bit dara dara

Lakoe golom na pocut meusubang.

Na limong reutoh nibak keunira

Ngon bandum rupa bit jrog andalan.

Di meusu nubak phon ubak sagoe

Keutanda putroe get that sukaan.

Deungon bunyian cit macam bagoe

Bandum sinaroe gong deungon canang.

Katroh lam balee le maharaja

Neuduk bak tahta nyang keu emasan.

Di dalam tiree meurudiwangga

Nyan singgah sana nyang meutatahkan.

Bandum peundeta habeh hade ka

Jipreh ngon sabda ubak sulotan.

Kanibak putroe le turon sabda

Wahe pendeta nyoe seukalian.

Taci cuba yue keuh sidroe wazi

Ubak nek siti tayue beujalan.

Tayue jak tueng leh cut pari gangga

Jinoe beusigra leugat yue datang.

Teuma di wazi neujak le lanja

Nibak nek tuha cit reujang reujang.

Kadeungon rakan siploh droe geuba

Neujak han tara bit get that tajam.

Gante ngon tajo bit hadoh hadoh

Yang reubah beudoh le seukalian.

Katroh le sampoe ubak nek tuha

Nyoe suroh raja nyang seukalian.

Nibak masa nyan di poe samlakoe

Cit neudeong sidroe rab bineh jalan.

Troh le utusan keunan ka sampoe

Deungon samlakoe pih meuhadapan.

Teuma teukeujot di teungku wazi

Hana jituri cut pirak upam.

Rupa neuh ceudah bit hana sakri

Di bujang tani bit ajeb han ban.

Deungon pakaian bandum di asoe

Meuh intan peudoe cit seukalian.

Deungon bee beewan meujeuneh bagoe

Deumpue sinarow cit kelengkapan.

Wazi that ajeb bit hana tara

Hantom nyang ka ka yang meunoe macam.

Saleh nyoe kadamg bit aneuk diwa

Tamise gamba meutatulehkan

Meunyoe keuh saleh cut pari gangga

Meunyang neuyue ba le pocut intan.

Nyoe dum noe bangon ngon kuluk rupa

Sang putroe muda han ek neupandang.

Nyoe salah saboh kanibak dua

Teuntee pih saja akan jeut keu prang.

Meunan neu waham le teuku wazi

Cut bintang pari sinan beudiam.

Di teuku wazi han jitheun hate

Kaneusuju le teuma le reujang.

Cut gangga pari neumarit pantah

Meubek neuseumbah ulon hai cut bang.

Hajat neuh oh na keumeung meulangkah

Ulon eu keumah deungon angkatan.

Teuma jaweub le di teuku wazi

Di patek ini cit peusurohan.

Sabda ka nibak cut putroe ahli

Nibak nek siti neuyue beujalan.

Kaneuyue jak tueng cut pari gangga

Teuma neuyue ba u balee kumbang.

Jinoe beusigra ka deungon hamba

Meunan neu sabda le raja intan.

Nibak masa nuan diponek siti

Neu eu le wazi keunan dum datang.

Laju ka keunan leugat peureugi

Kaneujak sudi le peu habaran.

Hantom nyang ka kak dilee yoh baroe

Peu buet teuh keunoe dum seukalian.

Wazi neupeugah teuma le leugat.

Yue le halarat buet syahi alam.

Diponek agam neuseuot leugat

Peutra meukarat kaneuyue datang

Peutra meugriet that nyoe beungoh beungoh

Hana meu muoh nibak kuwaham.

Wahe e cucoe cut eumpieng peu-oh

Hai buleun peunoh keudeh le reujang.

Teuma neujaweub le pari gangga

He ponek hamba nyang that andalan.

Ulon he ponek gohlom biasa

Meuhadap raja he ponek badan.

Cit tan lon tukri reusam ngon adat

Ulon nyoe that that bit kehinaan.

Nyan keuh he ponek hate ulon brat

Reusam ngon adat tan ulon tuban.

Meubit pih meunan ponek meutuwah

Meungbek na salah oh akhe datang.

Jak keudeh ponek tanyoe meulangkah

Ngat bek amarah bak syahi alam.

Di ponek inong neuseuot pantah

Wahe meutuwah nyang tha andalan.

Jikeumeung kalon keu masaalah

Cut putroe indah get that pintaran.

Beuhimat that that wahe meuh meuntah

Oh tee tapeuglah he pirak upam.

Ngon saboh nanggroe cit geubi upah

Nyoe ek tapeuglah wahe buleun trang.

Diponek agam neuseuot laju

Peutra roeh laku oh tameukalam.

Meunyang ta ingat sabe keu nafsu

Hana taci eu nyang di beulakang.

Hana taingat dudoe teuh susah

Kadang han ek glah cit pakri macam.

Cit reujang that that akan peunayah

Miseu ek leupah ka untong badan.

Keubit bak inong cit iek jiganu

Leo that peutupue oh tameukalam.

Han jan neuingat cit teuploh neukue

Laju le geuhue meuho sukaan.

Diponek agam meunan neukata

Seungab le haba cit oh nan diyam.

Oleh : Khairul Muna