Forzieri INT

8 Jan 2017

0 Comments
Posted in Global, Hikayat Aceh, Ca'e Aceh

MAKANAN HAREUM IKOT MANIKAM

Meuseubab tuleung, kulet bak badan.
Tajak han ceukang, taduek pih mangat.
Salam'alaikom, mula phon kalam.
Saleum lon layang, jaroe ta mumat.

Beureukat nini, nektu teuh adam.
Geutanyoe insan, peuneujeut umat.
Tapi mula nur, nibak janjongan.
Rasul tauladan, Nabi Muhammad.

Beureukat guree, keu ulon tuan.
Ilmee lam badan, jinoe ka jimat.
Uleh keurana, hai keu mudian.
Bah lon meurantam, di dalam riwat.

Haba lon tuleh, ireh han leukang.
Meubit meuligan, bek neukheun meucap.
Lon manusia, cit leo han faham.
Maklum hai rakan, meubek na seubab.

Seubab meugareh, meucureh kalang.
Ngon batee itam, laju tasikat.
Nyoe seubab peudeh, nyan peurasaan.
Beh pat hai rakan, lon mita ubat.

Lam kuta cikok, alamat lam blang.
Kadang gampong nyan, leo hana tupat.
Keu mukaddimah, bek le that panyang.
Jinoe hai taulan, ta tamong lam bab.

Nanggroe beureunuen, ramee that peukan.
Lampoh awe blang, ramee meuneukat.
Hudep geutanyoe, mula phon lajang.
Beutateuoh fham, pakriban syarat.

Hukom iseulam, beutanyoe reugam.
Minom ngon makan, bek roh nyang laknat.
Laknat keu tuboh, hareum geupeunan.
Bek meuka talan, laju ka takab.

Meubek tapajoh, bangke makanan.
Atra gob tacang, taniet ka nikmat.
Jeuneh lam tuboh, meuwoe MANIKAM.
Jatoh ke lubang, sinan phon jimat.

Oh na peureumoh, ka akhe lajang.
Hareum makanan, nyan jitreon seubab.
Oh taseutuboh, nibak simalam.
Akan MANI nyan, bagah meuleukat.

Ban ka meuleukat, meuwoe keu insan.
Hantreb teulheuh nyan, lahe ban nyang zat.
Teulheuh ban lahe, rayeok aneuk nyan.
Kadang pih kadang, jeut keu peujabat.

Oh ban kajeut jih, nanggroe lam reugam.
Dum seukalian, ka jipeusapat.
Han meuri hak droe, atra gob jilhan.
Hana di sayang, beuthat hak rakyat.

Teuma gob laen, laju ka geufham.
Meuyang di manyang, hana AMANAT.
Amanat keu get, cit brok geuseukang.
Seubab makanan, HAREUM YAH JILAT.

Hareum nibak yah, rhot lam MANIKAM.
Meuwoe keu badan, jiturot leugat.
Adak pih POMA, ureung gob seugan.
Teutap hareum nyan, ji ikot meuhat.

Nyoe lon PEUCONTO, saboh ngat neufham.
Ie krueng arongan, geutarek lam krat.
Kulah di rumoh, meukilat han ban.
Ban tauet kalang, jidu meukarat.

Kulah cit ka gleh, sapue tan leukang.
Laju nibak KRAN, geutanyoe peurab.
Oh ban ji ek ie, KAKUNENG HITAM.
Pat KEUSALAHAN, cuba peuleungkab ?

Beh keu jeunaweub, jinoe lon peundam.
Soe baca karang, neufham beuleukat.
Haba ka habeh, tambeh ka padam.
Adak sambungan, tanle ulon lhat.

Note : tapasang pipa lam krueng arongan, tatarek ie keunoe u rumoh tanyoe. Kulah cit kalheuh tapeugleh pokok jih ka beureuseh hana meuligan sapue le. Oh ban tabuka KRAN ie jih kakuneng itam.
Yang jeut keu pertanyaan :
PUE IE KRUENG SALAH, PUE KRAN YANG MEUGEURATAN ATAU PUN KULAH ?
Maka dari hai nyan, bek lah tapajoh MAKANAN HAREUM, dari makanan hareum nyan jeut aneuk geutanyoe keu PANCURI.
0 Comments
Posted in Global, Hikayat Aceh, Ca'e Aceh

BEUSEULAMAT


Krue seumangat, Rabbon izzat.
Nyang Hadharat, tanyoe pujoe.
Laen hana, meula-en Rabb.
Deungoe beuthat, ngat neutusoe.

Meunyan Raja, poe bu teumpat.
Dum lat batat, ban sinaroe.
Utoh makhluk, insan jai that.
Troh bak asap, ngon bak raboe.

Sidroe gaseh, bit meukeumat.
Nyan Muhammad, ureung lakoe.
Hana bandeng, laen sapat.
Nyang that hibat, Nabi Tanyoe.

Nabi tanyoe, nyang Poe ummat.
Timu barat, dum barangtoe.
Geuba islam, keu seulamat.
Bek meukeumat, bak buet rugoe.

Bak buet judi, ngon meu-upat.
Deungki laknat, han geubi toe.
Bak buet zina, inong tamat.
Mabok geucrat, bek roh tanyoe.

Bak ceumucue, cok meuneukat.
Bak peusapat, nyang kon hak droe.
Bandum neutham, han neubri mat.
Larangan Rabb, jioh bek toe.

Bak piasan, nyang mudharat.
Keunan pih that, meubek laloe.
Pokok jih nyan, bek neukarat.
Cit ka meuhat, bek roh tanyoe.

Tanyoe geuyue, bideung shalat.
Limong leungkap, beutasiboe.
Troh puasa, dan boh zakat.
Dan Lom ummat, teoh nyang beudhoe.

Teoh nyang haroh, beukeuh ta'at.
Beukeuh tamat, hak tuboh droe.
Mangat singoh, geupreh jeh pat.
syurga jannat, roh geupasoe.

Maka jinoe, neucep siat.
Teoh nyang mangat, pileh keudroe.
Peurlee dunya, tanyoe meumat.
Beh jak leugat, heut ngat sampoe.

Peurlee syurga, beukeuh teumpat.
Pubuet meuhat, ban suroh Poe.
InsyaAllah, cit seulamat.
Tanyoe ummat, hai rakan droe.

Alue manggeh, cabeung han pat.
Jidu lalat, rata sagoe.
Haba kabeh, bak nyoe siat.
Kakeuh sahbat, sep keu oh noe.

Oleh : Khairul Muna
0 Comments
Posted in Global, Hikayat Aceh, Ca'e Aceh

CINTA KEU NAFSU


Ji meudu pijet, gatai lam tuleung.
Ji kab han ek theun, gatai bit that that.
Nyoe saboh baet, kisah lon linteung.
Buet sidroe ureung, ulah that jungkat.

Nibak si uroe, jak u seulimuem.
Oh meuwoe ujeun, keubit that leubat.
Meupiyoh siat, bak rumoh ureung.
Bineh seurayueng, meuduek sep ladat.

Teungoh meuduek duek, sambe meulamuen.
Troh saboh buleun, indah keubit that.
Buleun bit punoh, bintang pih meugleung.
Hana nyang kureung, meusikrak urat.

Teuma ji ulon, lon langkah lam seun.
U baroh rinyeun, kalon meuhadap.
Tinggai pak Hendra, insinyur pateun.
Geuseunoh cang ceung, sampoe ka leungkap.

Teuma hana treb, ka pirang ujeun.
Kamoe pih meuplueng, jak woe u teumpat.
Akan teutapi, paloe bit meuseung.
Pak hendra jak tueng, cut putroe ubat.

Di jak u rumoh, leumoh han peu kheun.
Bek an ie leubeung, ie saka hankrat.
Meunan keuh tuto, haba jibuleung.
Ngat geubri ruweung, le mak cut langsat.

Akan teutapi, izin geusurueng.
Awak nyan aduen, jak pante barat.
Dijak oh beungoh, seunang hansoe kheun.
Cut adek buleun, karoh lam pukat.

Teuma oh dudoe, akhe pih kram krum.
Jiba lam uteun, aneuk pak amat.
Ban kalam uteun, beh peulom takheun.
Runyoh poe buleun, sinan geutakat.

Teulheuh nyan teuma, kageubalek kheun.
Cut adoe buleun, sigra geu intat.
Geuwoe u rumoh, bagoe ban geuplueng.
Keubah nyan geukheun, bak lon sep mangat.

Singkat ceurita, ka padum buleun.
Dara seulimuem, jeuneh ka mumat.
Ka meuboh labu, reot keu meulabeung.
Hana pat peutheun, seubab tan ubat.

Hingga bak hingga, akhe ban mandum.
Pak hendra geuplueng, ka ublang tufat.
Han geutem tanggong, jaweub han geukheun.
Buet nyan terlanjur, sinan geuboh wap.

Maka sinyak nyan, jiwoe u mideun.
Ji minom racun, meucukop leuzat.
Hingga pih akhe, nyawong Tuhan Tueng.
Meunalee bandum, sidroe han ek mat.

Meunyan dum paloe, pak hendra aduen.
Macam peukateun, geupeubeudoh wap.
Phon geubri cinta, janji geurangkul.
Akhe nyan bandum, geulanggeh meuhat.

Beh peutra takheun, lagee nyoe ureung.
Nyang pah bak rimueng, badan tayue kab.
Keubit that budoe, akai lam tuleung.
Jeuneh bit meuseung, cit paloe that that.

Aneuk tulo peo, keudeh lam uteun.
Teuma aneuk kleung, bak pucok langsat.
Oh noe keu rampoe, CANDA lon rayueng.
Kisah nyoe bandum, reka meuleukat.

Oleh : Khairul Muna
0 Comments
Posted in Global, Hikayat Aceh, Ca'e Aceh

SALAH PATEH


Nanggroe arab, tanoh that gleh.
Dak meulapeh, ureung jeuheut.
Lam Al-Qur'an, ka neutuleh.
Hansoe tindeh, dum barang buet.

Meuwoe aceh, siblah roet deh.
Nan teutuleh, ban meukeusuet.
Bagoe Meukah, bukon inggreh.
Tanda gaseh, le peuneujeut.

Seuramoe nyoe, bit that areh.
Sinyoe sijeh, cit ahli beut.
Tapi paloe, lheuh portugeh.
Gadeh gadeh, hanjeut kubuet.

Pakon seubab, wahe wareh.
Akai paleh, leo seumeuseup.
Seubab iman, cit ka lipeh.
Bagoe kuweh, oh tatubuet.

Agam inong, hanpeu sapeh.
Buet ka meuceh, adak hanjeut.
Larang Allah, han jipateh.
Dak gob cureh, hansit meucuet.

Dak ulama, gadeoh areh.
Asoe lam keh, hanjeut le suet.
Saweub jinoe, ji peujayeh.
Han jipateh, dak geupeubeut.

Qalam Qur'an, jiniet payeh.
Peulom hadeh, cit seuneukuet.
Aneuk jinoe, ka beureuteh.
Ala pranceh, ka jisukuet.

Ala barat, galak abeh.
Seubab keu jeh, galak jih jeut.
Jeut pacaran, mat boh beuteh.
Jeut cit eh eh, jeb ie laneut.

Jeut shok bajee, meunyang lipeh.
Jeut tob payeh, pakriban heut.
Meunan galak, aneuk gadeh.
Jinoe wareh, dum jipubuet.

Utom bangka, hansa pureh.
Utom manggeh, susah takrut.
Bak buet dosa, leo nyang pileh.
Leo soe sapeh, dak meutumuet.

Pade lilen, breuh that puteh.
Bu pih that gleh, cit meujeu-eut.
Hak nyang jilee, keu uroe jeh.
Hansoe pateh, beuthat geunteut.

Beh keuh hai kak, cut bang wareh.
Ban heut neukreh, laju ban buet.
Neu eu singoh, oh troh keudeh.
Oh geupeu-eh, teuka sukruet.

Hinan singoh, leumah abeh.
Beuneupateh, ban lon hayeut.
Seugoh nyawong, lingkeu gateh.
Kajeut pileh, yang get meuksut.

Tacreu awe, koh rangkileh.
Bek tak sideh, cabeung linuet.
Wassalamu, haba kabeh.
Pat nyang ireh, meu'ah pocut.

4 Jan 2017

0 Comments
Posted in Global, Hikayat Aceh, Ca'e Aceh

HIKAYAT GANGGA PARI (part 7)

Putroe Rakna Hayati

Subahanallah ajeb meulumpah
Akan keukisah keunyoe karangan.
Adak pih timoh, leo that masalah
Lon ilah ilah sampoe seuleusai.

Beugeubri le Poe teuh sidroe Allah
Beukeuh ek leupah lon nibak jalan.
Beu ek lon peugot ngon siap rawi
Beusampoe jadi wahe e taulan.

Keunyoe karangan masa yoh lawi
Yoh manteong sakti di dalam badan.
Yoh manteong di lee geumeutueng pari
Jeut ula ili jidalam awan.

Manteong na indra kadeungon diwa
Dan lom seureuta ngon jeuneh mambang.
Cukop meusyuhu di dalam dunya
Kheundak rabbana kanibak insan.

Gampong alue breuh ngon ujong rampu
Di coet geulungku na syahit lapan.
Bareh lon balek titek lon jampu
Meunyang tan nafsu neutulong diam.

Keurana susah ulon rok kata
Taeu b ngon a habeh meurupang.
Taeu m ngon i cit ka meutuka
Neuk maklum saja bek chok ngon waham.

Seubab lon abu bukon that hibat
Bak buet seumurat ilmee leo kurang
Leubeh lom teungku polem piadah
Watee meukisah keubit that timang.

Keuhai hikayat get that meupuep dah
Habeh geusurah paneuk ngon panyang.
Dan lom ka taeu keu dara bambi
Cit meuboh campli asoe di dalam.

Miseu tapajoh cit rasa keu eung.
Deungon boh kiyuen meuleupah masam.
Adak lagee nyan ulon cap laju
Polem bit hayeu nibak keumarang.

Tapi nyang paloe sipeu nyang kureung
Dari yoh jimeun cit manteong lajang.
Polem piadah leh tan geugalak
Keu sidroe cut kak seunupet badan.

Aleh tan tingat keu asoe kulak
Taeu meubhak bhak ji dalam rantang.
Aleh pih nafsu tanle meubacut
Abeh jilinteup nibak taeu sang.

Nyang na teuingat cit keucupo nang
Laen cut intan cit han geupandang.
Leh jipat leubeh meunyan bit cupo
Taeu that kuto gigoe meurumpang.

Alah kapaloe nyoe bit hai yah wa
Beh peunyoe reoh ka ulon keumarang.
Ulon neuk peugah keu ureung dua
Ka polem kuta roh lam sampiran.

Beh ka keuh jinoe keudeh tapuwoe
Akan keu cupoe meunyan dendayang.
Leugat ka dijak sapat han dideong
Meulenggak lenggong langkah meujalan.

Di po dendayang jijak le lanja
Akan seureuta seuon ngon hidang.
Juhoe ngon rakna neutreon le leugat
Kanibak deelat raja syah alam.

Oh troh dendayang ka ji peureugi
Ka jipeugah kri dum seukalian.
Kahabeh deumpeu dum jipeugah kri
Ban nyang kheun cut ti cit hana kurang.

Teukhem neuh bacut po bintang pari
Cit kaneukri lenggong ngon kalam.
Cut po dendayang katroh le lanja
Ubak nek tuha rumoh nyang manyang.

Di po dendayang kateuhah babah
Ji eu that ceudah bak sang buleun trang.
Teudong teutahoe hana peu peugah
Meubuju darah ban saboh badan.

Ta mise uroe cit teungoh beukah
Hu meujeureulah di dalam alam.
Cit kateudong le mise geupula
Hana le haba katahe mandang.

Hana tom ji eu dilee nyang ka ka
Tamise tupa ban pirak upam.
Ta mise keu meuh banlheuh geuteumpa
Deungon ie muka sit nadum intan.

Di po dendayang teuma neusujud
Bak teuot pocut nyang that andalan.
Cut gangga pari teuma teugeujot
Dipo bintang srot meunoe le kalam.

Pakon jeut hai da ulon taseumbah
Sit jeut keu teulah wahe dendayang.
Lon bukon bangsa ureung nyang meugah
Beh peu taseumbah e da dendayang.

Sabet keuh beuna cit ban takheun nyoe
Kanibak kamoe nyoe adat reusam.
Akan teutapi nacit meubacut
Meunyang meukeusut wahe buleun trang.

Meunghan lon turi padan ngon patot
Rugoe geuseubot ulon dendayang.
Cit sia sia lon neupeularha
Ka uleh raja meunyang po makam.

Hana meuri meuh deungon teumbaga
Nyan cit peucuma nama dendayang.
Cut gangga pari teuma neuseuot
Di ateuh patot hai kak dendayang.

Meuhoe keumeung jak hai kak bintang srot
Beh peu meukeusot keunoe ta datang.
Teuma dendayang seuot le pantah
Bit ceudah leupah si aneuk jalang.

Keujeut troh patek keunoe meulangkah
Cut putroe indah yue mee surohan.
Nyompat hai tungku hidang dua boh
Nibak pocut jroh nyoe peurseumbahan.

Jeh tanda euncien ka neuteurimong
Le pocut bungong nyan putroe intan.
Teuma na bacut kaneuyue tanyong
Seubab that bingong cut putroe intan.

Saleum bak putroe meunyang jroh rupa
Han ek lon buka nyang sikelian.
Akan masalah cut putroe muda
Ubak meukuta po syahi alam.

Gaseh ngon sayang bak pirak lipat
Neupeugah siat wahe buleun trang.
Seubab cut putroe get that meularat
Timu ngon barat jiteuka urang.

Bit hana daya keuneuk peulheuh droe
Di tuan putroe nyang that andalan.
Meunyan keuh seubab neumita ilah
Keumasalah beuneutem peutrang.

Meusoe nyang peuglah keu masaalah
Cit neubri upah peu peu sukaan.
Meunan neuharap cut putroe indah
Wahe meuh mirah nyang that andalan.

Teuma jaweub le cut pari gangga
Tadeungoe haba hai kak dendayang.
Bek laan nyan hai keu putroe muda
Ateuh jeumala bak ulon tuan.

Cit ka ulon niet intan peurmata
Sang sang peunawa keu ubat badan.
Sijuek ngon hate ulon lam dada
Ulon niet donya sang ka neuupulang.

Sang sang nibak lon hidang syuruga
Padum nan rasa he kak dendayang.
Akan teutapi na bacut susah
Keu masaalah ka neutanyong ban.

Beh pane daya deungon lon ilah
Han ek lon peuglah akai ulon tan.
Bek laan ulon nyoe saboh bala
Dum raja raja cit gadeoh ajam.

Dum aneuk raja deungon peundeta
Cit hana daya dum seukalian.
Keubit pih meunan hai da meutuwah
Ulon ci peuglah keu wayang wayang.

Salah ngon beuna nyang bek muruka
Seubab di hamba cit ureung dagang.
Hana eeleumee di dalam dada
Alah ka suka ulon pakriban.

Meungbit bek ramee hai da meutuwah
Beuna ngon salah ulon meukalam.
Meunan keuh haba cut bungong mirah
Neubeudoh pantah le po dendayang.

Beudoh neuseumbah cut pari gangga
Kajijak gisa laju u dalam.
Troh nibak putroe neupeugah haba
Cut pari gangga ka ulon pandang.

Ampon e pocut nyang that meutahta
Ulon eu rupa bit jroh hana ban.
Ta mise uroe di teungoh beukah
Cahaya limpah get that jeureulang.

Kanibak laku ulon eu rupa
Sang aneuk diwa meunan nyum sang sang.
Akan teutapi beuna ngon salah
Meubek amarah e syahi alam.

Meunan dendayang neupeugah haba
Kaubak raja cut pirak upam.
Ulon peuriwang nyoe ubak beunoe
Keu masa putroe neuyue mee hidang.

Teungoh neumarit cut pari gangga
Di ponek tuha keunan le datang.
Teuma ka neukheun le meunoe haba
Pajan ka teuka dikah dendayang ?

Teuma neuseuot cit baro saja
Wahe nek tuha ulon ba hidang.
Peubuet keuh keunoe nibak cuco kee
Nyan geukoh ulee keuh mate geucang.

Wahe e cucoe cut bungong kumbee
Nyoe jimeung tipee gata e intan.
Meunyang jroh aneuk bah keuh tabungka
Tajak udehta hai pirak upam.

Miseu kateuhah nyan babah buya
Cit jikab gata wahe buleun trang.
Maken sidroe teuk cut mulu teuma
Meunyan pih buya lam krueng seunagan.

Oh tee jikalon nyoe cuco hamba
Sit puteh mata dipo dendayang.
Meunan keuh tuto di ponek siti
Dibintang pari singab le yoh nyan.

Hana meusapeu jeunaweub neubri
Bak neukalon ri ponek muwayang.
Di po dendayang teuma neuseuot
Ponek jicarot le meunoe macam.

Bit datok suwang sirimueng angkot
Bak buet han patot oh tameukalam.
Bah keuh kupeugah ka ubak putroe
Kah kuyue pasoe u dalam teupang.

Bit datok paleh hana neuthee droe
Dum nyan sa gigoe ka habeh rumpang.
Nibak cek sari akan kupeugah
Bah nak geupoh kah nyawong keuh simpan.

Sigoe cit banlhee kuyue peusudah
Bit haram jadah kah datok suwang.
Oh ban nek deungoe ka meunan haba
Neupeugot geumpa le deungon badan.

Kayeo ngon atot jeub jeub anggota
Geucom le neuwa cut da dendayang.
Wahe e aneuk po bungong mirah
Ponek kaleupah nyoe bacut kalam.

Lon kateulanjoe nyoe bacut lidah
Beubek tapeugah nibak cut intan.
Bukon kusaja wahe meuh meuntah
Cit paleh babah lon he dendayang.

Cit kubri aneuk nyang ie bu peudah
Nak mangat leupah wahe buleun trang.
Nyang keuh ngon haba nyoe bek tapeugah
Wahe nyak pelah beh cut nyak sanan.

Meubek na tangieng lon siblah mata
Ulon ka tuha beuna ka sayang.
Di po dendayang seuot le pantah
Beh peutapeugah hai datok suwang.

Beunoe that galak oh neusuet lidah
Jinoe kateulah bit datok rumpang.
Cut gangga pari sibungong kumbee
Ka geungieng lagee ponek ngon dayang.

Ka teukhem bacut cut pari gangga
Nyan ureung tuha ka jipeuwayang.
Neu eu le ponek neupeuget beu ee
Bit get that digee kaneuba wayang.

Teutap keuh oh noe dilee nyoe haba
Beudoh neugisa cut po dendayang.
Oh ban sare troh u dalam kuta
Neupeugah haba ubak cut intan.

Ban ban nyang marit di bungong mulu
Cit meung sigeutue bit hana kurang.
Putroe neudeungoe hate neuh seu ue
Bingong geuneuk eu cut po andalan.

Nibak masa nyan di tuan putroe
Neuhoi pe meuntro ju rijang rijang.
Cit na sikeujab katroh le sampoe
Neubeuot jaroe get that meulayang.

Ditron le sabda ka ubak putroe
Wahe e meuntroe meunyang pilehan.
Neu eu peundeta meuna lapan droe
Toh toh yang raghoe akai geuh tajam.

Meunyang leo akai cit leubeh tuha
Beunyan tamita di dalam kawan.
Neupeugleh bulee ban sianeka
Cit satu apa he jangan kurang.

Na sidroe ureung keunoe neuk langkah
akan masalah jineuk peugah ban.
Nabsu jih pihtan raya sileumpah
Meunan nyang that sah oh di meukalam.

Oh tee lon ingat wahe e mama
Bit sangat beuna keu peukataan.
Miseu leo ureung cit keupeu guna
Oh akhe teuma kajeut keu wayang.

Bandum tieb tieb syoe meunyang teubuni
Nyang na geurasi cit ma'anikam.
Miseu ka lahe meunyang teujadi
Cit meuhat jadi bak akhe kalam.

Meunan keuh haba cut tuan putroe
Hingga ngon uroe pih sang kamalam.
Sehingga teuma le singoh uroe
Dituan putroe deungon dendayang.

Katroh u balee le teuma dudoe
Bandum sinaroe ji ikot sajan.
Katroh bak watee deungon kutika
Cut putroe muda nibak masa nyan.

Deungon dendayang dan balatantra
Di aneuk raja meunyang pilehan.
Cit bandum manteong bit dara dara
Lakoe golom na pocut meusubang.

Na limong reutoh nibak keunira
Ngon bandum rupa bit jrog andalan.
Di meusu nubak phon ubak sagoe
Keutanda putroe get that sukaan.

Deungon bunyian cit macam bagoe
Bandum sinaroe gong deungon canang.
Katroh lam balee le maharaja
Neuduk bak tahta nyang keu emasan.

Di dalam tiree meurudiwangga
Nyan singgah sana nyang meutatahkan.
Bandum peundeta habeh hade ka
Jipreh ngon sabda ubak sulotan.

Kanibak putroe le turon sabda
Wahe pendeta nyoe seukalian.
Taci cuba yue keuh sidroe wazi
Ubak nek siti tayue beujalan.

Tayue jak tueng leh cut pari gangga
Jinoe beusigra leugat yue datang.
Teuma di wazi neujak le lanja
Nibak nek tuha cit reujang reujang.

Kadeungon rakan siploh droe geuba
Neujak han tara bit get that tajam.
Gante ngon tajo bit hadoh hadoh
Yang reubah beudoh le seukalian.

Katroh le sampoe ubak nek tuha
Nyoe suroh raja nyang seukalian.
Nibak masa nyan di poe samlakoe
Cit neudeong sidroe rab bineh jalan.

Troh le utusan keunan ka sampoe
Deungon samlakoe pih meuhadapan.
Teuma teukeujot di teungku wazi
Hana jituri cut pirak upam.

Rupa neuh ceudah bit hana sakri
Di bujang tani bit ajeb han ban.
Deungon pakaian bandum di asoe
Meuh intan peudoe cit seukalian.

Deungon bee beewan meujeuneh bagoe
Deumpue sinarow cit kelengkapan.
Wazi that ajeb bit hana tara
Hantom nyang ka ka yang meunoe macam.

Saleh nyoe kadamg bit aneuk diwa
Tamise gamba meutatulehkan
Meunyoe keuh saleh cut pari gangga
Meunyang neuyue ba le pocut intan.

Nyoe dum noe bangon ngon kuluk rupa
Sang putroe muda han ek neupandang.
Nyoe salah saboh kanibak dua
Teuntee pih saja akan jeut keu prang.

Meunan neu waham le teuku wazi
Cut bintang pari sinan beudiam.
Di teuku wazi han jitheun hate
Kaneusuju le teuma le reujang.

Cut gangga pari neumarit pantah
Meubek neuseumbah ulon hai cut bang.
Hajat neuh oh na keumeung meulangkah
Ulon eu keumah deungon angkatan.

Teuma jaweub le di teuku wazi
Di patek ini cit peusurohan.
Sabda ka nibak cut putroe ahli
Nibak nek siti neuyue beujalan.

Kaneuyue jak tueng cut pari gangga
Teuma neuyue ba u balee kumbang.
Jinoe beusigra ka deungon hamba
Meunan neu sabda le raja intan.

Nibak masa nuan diponek siti
Neu eu le wazi keunan dum datang.
Laju ka keunan leugat peureugi
Kaneujak sudi le peu habaran.

Hantom nyang ka kak dilee yoh baroe
Peu buet teuh keunoe dum seukalian.
Wazi neupeugah teuma le leugat.
Yue le halarat buet syahi alam.

Diponek agam neuseuot leugat
Peutra meukarat kaneuyue datang
Peutra meugriet that nyoe beungoh beungoh
Hana meu muoh nibak kuwaham.

Wahe e cucoe cut eumpieng peu-oh
Hai buleun peunoh keudeh le reujang.
Teuma neujaweub le pari gangga
He ponek hamba nyang that andalan.

Ulon he ponek gohlom biasa
Meuhadap raja he ponek badan.
Cit tan lon tukri reusam ngon adat
Ulon nyoe that that bit kehinaan.

Nyan keuh he ponek hate ulon brat
Reusam ngon adat tan ulon tuban.
Meubit pih meunan ponek meutuwah
Meungbek na salah oh akhe datang.

Jak keudeh ponek tanyoe meulangkah
Ngat bek amarah bak syahi alam.
Di ponek inong neuseuot pantah
Wahe meutuwah nyang tha andalan.

Jikeumeung kalon keu masaalah
Cut putroe indah get that pintaran.
Beuhimat that that wahe meuh meuntah
Oh tee tapeuglah he pirak upam.

Ngon saboh nanggroe cit geubi upah
Nyoe ek tapeuglah wahe buleun trang.
Diponek agam neuseuot laju
Peutra roeh laku oh tameukalam.

Meunyang ta ingat sabe keu nafsu
Hana taci eu nyang di beulakang.
Hana taingat dudoe teuh susah
Kadang han ek glah cit pakri macam.

Cit reujang that that akan peunayah
Miseu ek leupah ka untong badan.
Keubit bak inong cit iek jiganu
Leo that peutupue oh tameukalam.

Han jan neuingat cit teuploh neukue
Laju le geuhue meuho sukaan.
Diponek agam meunan neukata
Seungab le haba cit oh nan diyam.


Oleh : Khairul Muna
0 Comments
Posted in Global, Hikayat Aceh, Ca'e Aceh

HIKAYAT GANGGA PARI (part 6)

Putroe Rakna Hayati

Di miriek pulo bit karu subra
Jeut jeut blang raya habeh jilangkah.
Tapuwoe kisah keu ureung bungka
Utosan raja teungoh meulangkah.

Utosan jinoe teungoh jiriwang
Neumee balasan cut putroe indah.
Kajijak laju hana jipiyoh
Hingga sampoe troh u nanggroe meugah.

Katroh u nanggroe purpita sani
Laju ji sudi uleh kalifah.
Neubeuot jaroe di ateuh ulee
Dipeugah lagee keu buet nyang sudah.

Ampon tuanku meuribee ribee
Nyan bungong kumbee kalon kaleon sah.
Hana tom lon eu meunan nyang ka ka
Mise ban rupa cut putroe indah.

Leumah ngon leumbot neumeusuara
Bagoe ban saka cit maneh babah.
Deungon rupa jroh bit hana bandeng
Nyan nanggroe aseng cut putroe meugah.

Ngon di boh beuteh meujeundrang pade
Bit hana mise ngon ulon peugah.
Oh tee takalon rindu lam hate
Sang sang meugule sinan teuh reubah.

Teuma boh hidong meurancong kalam
Dhoe neuh meupatam bit sangat indah.
Watee takaleon hate teuh dendam
Cit meutang ilang oh tacok langkah.

Ok nibak ulee cit patah manyang
Sanggoi neuh timang meu ulah ulah.
Meusoe nyang kaleon ulee teuh mumang
Hana bandengan cut putroe indah.

Takue neuh panyang sang sang geulirek
Gigoe neuh lintek meu meuh keureutah.
Tabuka buju bit seudang baek
Sang teungoh di ek nyan buleun peut blah.

Kadeungon rupa keubit jroh patot
Ngon leumah leumbot taeu dilidah.
Adak pih taduek di dalam supot
Panyoet hanpeu tot wahe kalifah.

Oh ban jideungoe yang meunan haba
Jeut le geumpa nyan raja meugah.
Ka leumoh badan jeub jeub anggeeta
Sang ka dimata cut putroe indah.

Hingga teuma le kajijok surat
Ka ubak deelat nyan raja meugah.
Neuyue buka le teuma keuh leugat
Tacuba lihat peutra dipeugah.

Keurani neucok geubac surat
Ban ban nyang adat yang teulheuh sudah.
Deungon haba jroh bit that meucakab
Diraja deelat marit le pantah.

Kahabeh maklum bandum nyan haba
Nibak adeknda kalom neupeugah.
Neuyue hoi bandum bena pendeta
Ngat tabicara yang nyoe masalah.

Meunyang ji su-eue ka uleh putroe
Beh ci hareutoe jinoe le pantaj.
Meusoe nyang peuglah meunyan keuh lakoe
Meunan cut putroe cit neumeutatah.

Kaji beudoh le nyan jabat lanan
Peundeta keunan dum abeh dikrah
Dalam ji seu-eue uroe ngon malam
Meusidroe pih tan han ek jipeuglah.

Ubena bandum meunyan pendeta
Cit han ek kira keunyan masalah.
Teuduek keuh oeh noe nyoe jilee haba
Keupari gangga nyoe ulon peugah.

Nibak masa nyan cut pari gangga
Cumboi neu upu teuma le reujang.
Katroh le teuka nyan peut droe raja
Ka neumeusabda cut pirak upam.

Hai raja juhoe ngon rakna hikmat
Tabeudoh dua jak bak sulotan.
Ka ubak putroe nyang that johari
Euncien lon ini tajak jualkan

Gata syah daloe raja aman lah
Jinoe meukeumah wahe du badan
Mungken siat teuk laen peukara
Jadeh ta bungka nibak cut intan.

Raja dua droe peu ubah rupa
Meunan sabda nibak cut intan
Takheun keuh ulon nyoe keumeung bungka
Hansep beulanja keupangkai jalan.

Watee geutanyong padum hareuga
Dum dum nyang suka cut putroe intan.
Raja johoe ngon rakna hikeumat
Deungon cit siat katroh u dalam.

Mise ban rupa cit ponek siti
Bak putroe hayati neu ek le reujang.
Neusujud sembah ka ubak gaki
Cut ponek siti neumarit nyoe ban.

Peuampon deelat nyang that meutahta
Cut pari gangga suroh yue datang.
Nyompat na sineuk euncin ulon ba
Keu po meukuta neuyue jualkan.

Seubab digob nyan keumeung neuk bungka
Hana beulanja le meung sigeupang.
Meunyan keuh seubab keunoe ulon ba
Lon harap raya geunaseh sayang.

Teuma neujaweub cut mulu sari
Hai ponek siti nyang that andalan.
Hoji keumeung jak cucoe gata
Taci calitra he ponek badan.

Jicok ngon euncien teuma le sigra
Ka jipareksa bit jroh hanaban.
Jikalon ngon hu jroh that meucahya
Cut mulu teuma ka hireun mandang.

Laju jijok le kaubak putroe
Hai tuanku droe bit jroh han macam.
Nyoe mata zamrot bit that seureuloe
Di dalam nanggroe hana ngon padan.

Ka neusambot le buet bungoeng leupu
Watee ban neu eu bit jroh hana ban.
Ajaeb sangat ban neu eu laku
Cit meucahya hu nyoe mise intan.

Teuma neutanyong bak ponek tuha
Ka neupareksa jinoe le ngon trang.
Padum keuh nayum hai ponek teuma
Neupeugah lanja beureujang reujang.

Teuma neuseuot nyan ponek pura
Ngon jaroe dua neubeot meulayang.
Ampon e pocut nyang that mulia
Suai hareuga hanjeut lon peutrang.

Ban ban nyang meuphom nibak meukuta
Ban ban nyang suka bak syahi alam.
Lagi tuanku cit sidroe raja
Cit na keunira ngon undang undang.

Teuma neujaweub le tuan putroe
Keubit datok nyoe get that andalan.
Diponek siti teuma neuseuot
Beuna ngon patot hai deelat laman.

Bit tan jipeugah uleh bintang srot
Pakri lon peurhot nyan beukataan.
Cut mulu sari jikheun le nyoe ban
Keubit euncien nyan bukon andalan.

Hareuga that leo bit hana bagoe
Ngon saboh nanggroe pih hana padan.
Han ek kamoe boh yum ngon hareuga
Beuthat bak raja sideh nanggroe syam.

Cut mulu sari meunan meuhaba
Diponek tuha neuseuot nyoe ban.
Keu bintang kutob nyan tanda nanggroe
Hu mata uroe meunyang leubeh trang.

Nyoe saboh euncien bit han ek kabloe
Sia nyoe nanggroe gata tapeugang.
Teuma neujaweub cut rakna cinta
Beh peu roe haba oh tameukalam.

Bit sia sia gata ka tuha
That kureung aja kah datok suwang.
Di ponek siti seuot le meunoe
Bek aja kamoe miseu yang kurang.

Cit kaseb that that lon jipeureunoe
Le cucoe kamoe neubri ajaran.
Cut mulu sari seuot le pantah
Keubit that ceudah bit ponek rumpang.

Dilee kon hana nyoe rancak babah
Pakri jinoe bah rancak hana ban.
Adak kutupue cit kukoh lidah
Kusudee ngon gah hai ponek suwang

Pakri keuh jinoe jeut rancak raya
Hai ponek tuha neupeugah reujang.
Cit hana patot sidumnan haba
Sang sang kon gata oh tameukalam.

Di ponek siti lom neukheun meunoe
Neudeungoe kamoe wahe cut intan.
Bukon keuhaba keudeh ngon keunoe
Kaseb bak kamoe keupeulajaran.

Bukon le sayang di cicem ujeun
Di dalam naleung jipeugot sarang.
Cit kaseb that ie ka deungon umpeun
Ta mise bayeun di dalam jendrang.

Hana le sapue meunyang na kureung
Wahe cut buleun nyang that andalan.
Get that meutuwah bit cahya buleun
Ban ban ulon kheun cit ateuh jalan.

Teuma neuseuot cut putroe kande
Hai ponek bekle nyoe tamuwayang.
Jak leh neutanyoeng bak bungong pade
Nyoe padum hase hareuga nyang trang.

Nyang lon meukeusuet wahe ponek droe
Cit han ek soe bloe he ponek badan.
Hareuga le that bit hana bagoe
Bit jroh tapuwoe le tapeuriwang.

Ponek neujaweub le teuma sigra
Nyoe hana daya le lon peuriwang.
Lon takot marah nyan cucoe hamba
Bak akhe masa ulon jihantam.

Nyoe bahle tinggai bak kaman dilee
Ulon jak teuntee he syahi alam.
Peu peu nyang sabda cut bungong kumbee
Akan lon bri thee he deelat makam.

Teuma neuwoe le juhoe ngon rakna
Cut putroe teuma hana geutuban.
Nibak neukira cit ponek siti
Hana ubah hi deungon lakuan.

Putroe neumarit teuma le meunoe
Bak sang euncien nyoe leumah malam nyan.
Meunyang ulon eu di dalam lumpoe
Bit meunoe bagoe nyan keulakuan.

Cut mulu sari le neumeuhaba
Bak sang ka nyata nyoe keulaheran.
Lagi keuh nyang mee nyoe ureung tuha
Sang bit rab rab ka nyoe keunyataan.

Meunan neumarit cut mulu sari
Kajipeugah kri le meunan macam.
Ban ban nyang narit cut putroe muda
Ka jipeuhaba teuma le yoh nyan.

Teuma neujaweub cut pari gangga
Jak leh tagisa keudeh u dalam.
Takheun saleum lon kanibak putroe
Euncien ulon nyoe keu peuseumbahan.

Adak ulon mee pih hana soe bloe
Seubab dikamoe nyoe keumeung jalan.
Peuseumbahan lon keu tuan putroe
Tajak peugah proe le reujang reujang.

Di raja juhoe leugat neugisa
Rupa nek tuha lom keulakuan.
Deungon sikeujab troh dalam kuta
Neu ek le lanja bak putrow intan.

Neuseumbah sujud bak tuan putroe
Neubeuot jaroe cit meuatoran.
Neuampon pocut si payong nanggroe
Katroh ulon woe meujak tanyong ban.

Neusembah saleum cit raya that that
Pada halarat di bawah kidam.
Nyan peusembahan cit pada deelat
Meunan neuhatap le aneuk agam.

Nyoe jikeumeung ba cit hana guna
Soe bloe pih hana di dalam makam.
Nyoe peuseumbahan cut pari gangga
Keu poe meukuta he syahi alam.

Seubab di sinyak cit keumeung bungka
Keutanda mata nyoe jitinggalkan.
Keu dudoe jampang keunoe di teuka
Nyan cucoe hamba sit aneuk agam.

Meunan neumariet di ureung tuha
Cut putroe muda meunoe neukheun ban.
Nyoe hana patot hai ponek hamba
Akan hareuga dumnan sembahan.

Bukon meuribee kon cit meulaksa
Bit hana daya ulon kabulkan.
Ulon teurimong peu peu paidah
Oh tan tabalah peutra gunaan.

Cut mulu sari neuseuot teuma
Wahe meukuta po syahi alam.
Mustahe han ek miseu neubalah
Wahe meuh mirah nyang that andalan.

Neuteurimong keuh wahe kalifah
Bak ulon mudah keu pembalasan.
Teuma di putroe neujaweub leugat
Ban ban nyang pakat ulon ikotkan.

Meungbek na cupa kanibak adat
Meunyankeuh beuthat gata ingatkan.
Cut mulu sari jaweub lom teuma
Beh pakon cupa he syahi alam.

Kadum nan digob deungon hareuta
Bit tan mulia nibak janjongan.
Peucit keuh jinoe wahe meukuta
Keuneubri tanda meunyang kabulkan.

Meungkana syarat bak neuteurimong
Sit meunan keunong nibak patek pham.
Meunan neumarit cut mulu bungong
Hana peu tanyong cit leubeh ajam.

Cut mulu sari meunyang meubudhoe
Ka jipasoe le dua boh talam.
Cit dum makanan meunyang seureuloe
Kajiboh dudoe deungon bee beewan.

Bak ponek siti kajijok lanja
Keu nyoe tajak ba hai ponek intan.
Tanda keu euncien nyan meuh peumata
Cukop mulia bak syahi alam.

Harap putroe ponek neupeugah
Keu masaalah gaseh ngon sayang.
Baranggapue jeut meunyan keu upah
Asai beu ek glah nyan permintaan.

Di ponek siti neuseuot meunoe
Beh taeu kamoe he cut nyak intan.
Bek di antara ulon puwoe nyoe
Meung ulon jak droe get that sukaran.

Cut mulu sari di meuhoi sigra
Ka jihoe dua teuma dendayang.
Tajak keuh jinoe gata hai poda
Jinoe tajak ba dua boh talam.

Tajak joh keudeh keu pari gangga
Nibak nek tuha nyan sinan diyam.
Beutakheun saleum bak tuan putroe
Keu euncien baroe tanda muliaan.

Beu neuteurimong deungon sibagoe
Saleum bak putroe cit meunan macam.
Meunyang na bacut di putroe indah
Keuhai masalah hana soe peutrang.

Meunan hai da e gata ta peugah
Tajak leh pantah ju reujang reujang.
Deundayang neujak deungon nek tuha
Katroh u luwa sampoe beujalan.

Juhoe ngon rakna le meunoe haba
Kajak leh lanja le kah dendayang.
Bah tinggai sinoe siat di hamba
Siat treuk teuka lon di beulakang.

Cut po dendayang neujak le lanja
Deungon seureuta seuon ngon hidang.
Wie deungon uneun hana jikaleon
Langkah jiteukom dijak sep tajam.
Oleh : Khairul Muna

SALEUM SIREUGAM

Tapeugot lumbeng, mata beutajam.
Sigoe tagulam, dumpue beuabeh.
Salam'alaikum, saleum sireugam.
Sambot e taulan, neucok hai wareh.

Meuri bak bunoet, meuoh bak mancang.
Meuri bak mamplam, deungon rangkileh.
Nibak hana buet, lon cuet keunarang.
Neudeungoe beutrang, peu nyang lon tuleh.